Tuesday, October 16, 2012

PHAR NATNA VEITUTE KA CHIBAI VE TA


October ni 9, 2012 zing khan Tlabung lam panin ka zin a, chhun dar 12: 30 pm velah Tlabung hmun thlengin, ka thlenna Zodin-ah ka bungrua te nghatin ka han awm hahdam deuh hlek hnu chuan, Tlabung hmuna awm ka cousin Mazuala chu hmun ka tlawh tur awmna vel ka hriat loh avangin min kalpui tur chuan ka sawm a, kan pahnihin Tlabunga ka tlawh tum hmun hrang hrang tlawh tur chuan Taxi hmangin kan tlan ta a ni.
(T. Shirt Pawl ha hi keimah ka ni)

            Zodin atangin Tlabung Civil Hospital lam panin kan tlan thla a, Civil Hospital piaha kawng peng lamah chuan Phar Damdawi In pan chuan kan tlan phei zel a, thui em em pawh tlan ngai lovin kan piah lawka, “Leprosy Hospital, Tlabung” tih lo intar leh Phar Damdawi In building hmun fal deuh raiha lo awm chu kan hmu ta. Taxi atanga chhukin Phar Damdawi In building thla te chu ka lak zawh hnuin damdawi In chhung lama lut tur chuan ka han inbuatsaih a, vawikhatmah phar la hmu ngai lo ka nih mai bakah, engtia han biak tur nge ni ang a, engtin nge min lo dawnsawn ang tih pawh ka ngaihtuah thiam chiah lo. Mah se, hei leh chen ka kal tawh a lawm tiin, Damdawi In chhungah chuan ka han lut ta a ni.
           
Phar Damdawi In ka tlawh chanchin tawite ka ziak tak tak hmain, Mizorama Phar enkawlna damdawi In (Leprosy Hospital) awm chhun Tlabung a mi hi 1978 khan din tan a ni a, Phar enkawl/mutna  khum awm tura tih a ni a, tunah hian Phar enkawl lai mi pathum (3) an awm mek a ni.
           
Leprosy Mission lam rawngbawlna sermon vawi tam tak lo ngaithla tawh mah ila, tu emaw sawi angin, “Phar te ka hmuh chuan ka chibai miah lo ang a, min lo chibai hmain, kut pahnih suihin, ‘NAMASTE’ tiin kun zeuh zeuh ila a ni mai” tia a sawi kha ka ngaihtuah chhuak a, kei hian tunah phar natna vei mektute chu ka hmu dawn ta a, ka chibai ang nge chibai lovang tih pawh ka ngaihtuah nasa hman hle a, amaherawhchu, eng nge ni raw sek sek ka chibai loh ang, an mahni chu ten leh an deh hlau tak anga ka awm min hmuh ka duh lo hrim hrim, chuvang chuan ka chibai ngei tur a ni tiin, ka rilru ka siam fel ta a ni.

Tuesday, April 17, 2012

PHAWNGPUI TLANGA’N


Tuanzai relin an sawi Phawngpui tlanga’n,
Riahrun sawnin tlang lawn zai kan rel e;
Zothlifim leng vel hah tidam tura’n,
Thaw heuh heuh, hlim ten dawn zai kan rel e.


Khua chuan, hawi velin romei lo zam e,
Hring len vangkhua leh raltiang tlang thliri’n;
Chawngpereng tel lo, hlimzai kan vawr e,
‘D’ tel ve lo, hlim te a, lam thaii’n.


Tlangbawm Chhawkhlei par leh Nauban parte,
Vul zai a rel,  par an chhuah tlang mawia’n;
Tel ve lo ‘D’ tan thliah ka nuam ngei e,
Thliah rem lo par, vul reng la tlang mawia’n


Kan tuanna Farpak, Phawngpui tlang kha maw,
Tialpari puk nen tawn leh ni awm maw?


Shakespearan sonnet
Rhyme: abab cdcd efef gg
Iambic Pentameter
Dt. 24th March, 2012

KAN HNAM NUNZIA LEH NUNPHUNG THANGTHARTE THINLUNGAH TUH A TUL


“Kan hnam nunzia leh nunphung thangtharte thinlungah tuh a tul” tih  thupui hmangin thu kan sawi dawn a, a hmasain thangtharte thinlunga kan tuh tur kan hnam nunzia leh nunphung kan tih tak chu eng nge ni ang? Kan hnam nunzia leh nunphung tam tak zingah a zawng a zain thangtharte thinlunga tuh hi a tul vek angem tihte pawh kan ngaihtuah tel erawh a tul awm e. Tun tumah chuan kan hnam nunzia leh nunphung, kan pi leh pute hunlaia an lo chin dan thin, nunze mawi leh entawn tlak, an khawsak dan chungchanga an nunphung tha tak tak, hun lo inher zela tunlai thangtharte khawvel lo inher chhuakah, khang kan pi leh pute hunlaia kan hnam nunzia leh nunphung tha tak takte kha kan theihnghilh mai lohva, kan chhawm nun zel theih nan thangtharte thinlungah a tharah kan tuh zel hi a tulin a pawimawh em em a, chutianga thangtharte thinlunga kan tuh tul ang chi thenkhat emaw chauh kan sawi hman dawn a ni.
       Ka han sawi lan tel leh duh hmasak chu, khawvela hnam tinte hian an pi leh pute hunlai atanga lo chin thin dan, hnam nunzia leh nunphung ze nghet tak an nei theuh hlawm a, hetianga hnam zia leh nunphung hran neih hi thil pawimawh leh tangkai tak niin, hnam hrang hrangte kan inhriat hran a, a tha lo zawng ni lova kan inthliar hran theihna thil tangkai tak a ni. Chutiang bawk chuan keini Mizote pawh hian kan pi leh pute hunlai atang tawhin  lo chin thin dan hnam zia (culture) leh hnam nunphung kan nei ve a, khang kan hnam nunzia leh nunphung tha tak takte kha; thangthar lehzel hun kan lo chuankai hian a bo telh telhin, nakinah phei chuan kan hnam zia leh nunphung pawh hre mang lova kan khawsak theih hun hi lo la thleng thei a ni. Tun dinhmunah ringawt pawh hian han ngaihtuah ta ila, kan hnamzia leh nunphung tha tak  tak ni si; tam tak kan hriat mang tawh loh leh kan chin than tawh lohte pawh a awm chho ve mek zel a nih hi!

Friday, March 16, 2012

“KUCH TOH LOG KAHENGE”

Dr. Ashutosh & Dr. Nidhi
Dr. Ashutosh-a thar (Sharad Kelkar)

Dr. Nidhi Verma
Lenlai a rual lo hi............!!!:   
    Tunlaia Hindi Serial Film kan en lar tak pakhat chu, “Kuch Toh Log Kahenge” hi a ni awm e. He Serial Film thawnthu hi Kamlesh Pandey ziak niin, thawntanni - Zirtawpni zan dar 8:00-ah a chhuak thin a, Season khatna-ah hian Episode 118 thleng chan tawh a ni. (March ni 14, 2012).
    “Kuch Toh Log Kahenge” serial film hi hmangaihna thawnthu, kum lama inrual lo tak, a changtupa chu a changtunu aia kum 18 zeta upa anih avanga an inkara harsatna awm chungchang a ni. Mizote pawhin kum avang hian in hmangaih leh inngaihzawnna kawngah harsatna chu kan nei ve tho awm e. Kan hla pakhatah pawh,
“A rem lo nang nena lendun hi,
Engdang vang a ni lo lungrunpui,
I pian a tlai kei hma si a,
Lenlaia rual lo hi a pawi ber ber mai!”

    tihte pawh a awm ve tho kha maw!
    A changtu-ah harsatna an tawk:
    “Kuch Toh Log Kahenge” serial film hi an chang chho mek zel a, hetih lai hian harsatna hrang hrang an tawk chho ve bawk a, a chhan chu he film-a changtupa ber Dr.  Ashutosh (A hming tak Mohnish Behl) chu he film-ah hian chang chhunzawm tawh lovin a aiawh Dr. Ashutosh-a thar (Sharad Kelkar) chuan a chang chho ve thung a. Hetianga serial film a zawh hma hauhva a changtupa ber thlak a ngai ta hi he serial film en thin tam tak chuan an duh lovin sawiselna a nasa hle a. Hei hi engvang nge a chhan ni ang tia zawhna hrang hrang a awm mek laiin, he serial film siamtute lam chuan Dr.  Ashutosh-a hmasa zawk hian a hnung zang a tihnat avang leh a hriselna a that tawk loh avangin a chan chhunzawm thei lova chuvang chuan a aiah midang chan chhunzawm tir a nih thu an sawi a, hetiang a nih lai hian, he serial film en thintute chuan hei hi awih lovin Dr.  Ashutosh (A hming tak Mohnish Behl) ngei hian chan chhunzawm se an duh a, hetianga an ban mai hi an hrethiam lo a ni.

Friday, October 7, 2011

Chuck Bartowski hi tunge a nih??

    Thalai hovin tunlaia an lawm em em, TV hmaa an thut tam phahna CHUCK TV serial-a a changtupa ber Chuck Bartowski hi a hming dik tak chu Zachary Levi Pugh a ni a, 29 Sept, 1980 a, Lake Charles, Louisiana, USA a piang a ni a; TV Actor a nih mai bakah director a ni a, singer a ni bawk.
    Lemchan thiam tak a ni lo thei lova, kum 6 mi lek a nih lai atangin Theatre lamah lemchangin a lo in lan zak zak tawh. Chuck film-ah hian Yvonne Strahovski nen chang dunin Teen Choice Awards 2010 - ah Chuck film an chan that dun em avangin Best action Actor  leh Actress a thlan dun an ni. Kum 2008 khan Zachary Levy hi Entertainment Weekly's Top Thirty People Under Thirty a thlanchhuah zingah a tel.

Friday, September 30, 2011

Lehlin film leh a behbawm

    Tunlaia kan film en tam ber leh kan buaipui viau chu Korean film hi a ni awm e. Thenkhatten Korean film an nin zia an tlangaupui chiam laiin, thenkhatten tih tawp mai an hlauh thu leh, a ning zawnga lo tlangaute khak zawnga awka lo chhuah ve tawk an awm bawk. Enga pawh nise, kei chuan engti hawi zawng berin nge han ziak ka tum pawh ka hre chiah lem lova, a behbawm vela kualin, tute emaw angin, ‘Thlarau thawh dan a zir zelin’ rilru a rawn lut a piang han thai chawpchilh mai ka tum zawk a ni.
    Tunlaia Korean serial film kan buaipui chiam ang hian tunhma deuh han ti ila, hun rei vak pawh la ni loah khan, vai film ‘Kasautii Zindagi Ki’ kan buaipui chiam tawh a, khami hnu deuhah, “Karam Apna Apna’ tih emaw ni? A film hming ka hrefuh chiah engem aw? Kan buaipui leh chiam anih kha!
    ‘Kasautii’ thlipui Mizoramah a tleh lai kha chuan, a buaithlak thin teh anih kha! Cable Network lam ten a chhuah hun tur an han siam a, chumi dar zat hre reng chuan kan chang far a. Naupang mai chu sawi loh, nula leh tlangval, nu leh pate pawhin hmuhnawm an ti em em a, a lo sel ve tawk pawl chu an awm reng tho a ni.

Thursday, September 22, 2011

Hmeichhe mawngtam a zai ching an zawng mek

    Hmeichhe mawngtam blade a zai ching Johnny D. Guillen Pimentel chu Police in man tumin ngawrh takin an zawng mek. USA- a Virginia state-ah hepa hian kumin 2011 February atang khan hmeichhe 9 zet an mawngtam-ah blade in a zai sak tawh. Amah hi kum 40 mi a ni a, Fairfax County-ah kawtthler a hmeichhe kal laite chu an mawngah zai sakin a tlanbo leh daih thin. Amah hi Peru mi a ni a, Peruvian press in an tarlan dan chuan paraphilia vei a ni a, mipat hmeichhiat kawnga mi danglam tak a ni, an ti.

Internet star zinga hlauhawm ber supermodel Heidi Klum

    Supermodel Heidi Klum chu internet a star zinga hlauhawm berah chhal a ni a, mipa-ah chuan Talk Show host Piers Morgan chu a hlauhawm ber tiin security company MCAfee Inc., in a puang. Hmeichhe lamah hian nikuma hlauhawm bera thlan Cameron Diaz chu kuminah pahnihna a ni.
    Anmahni ni lovin internet hmanga heng celebrity zawngtute hian an zawnna lamah virus an personal computer leh laptop-ah te a kai nasat thin vang a ni a, fimkhur turin thu rawn an pe nghe nghe a ni.
    Heidi Klum hi ngaihven hlawh tak mai a nih avangin internet lamah a thlalak leh chanchin zawngtu an tam mai a, chuta tanga virus avanga an PC leh laptop chhe ta an tam hle a nih chu.

Friday, September 16, 2011

Beijing khawpuiah duty atan Ui an hmang tangkai

    China ram khawpui Beijing-ah chuan khawpui chhunga patrolling a tan Ui an hmang a, a tangkaiin a sawt hleah an ngai. Nikum July-August chhunga he khawpuia pawikhawih leh ruk ruk thleng chu kumin he hun angah khan za a 12.6 zetin a tlahniam a, patrolling a tana Ui an hman tam tak vangah an ngai. Ui 100 chuang leh anmahni train tu mi 65 te chu patrolling-in he hunah hian an fehchhuak a ni. Police in Ui an vulh fin 500 zet an nei mek a, misual pawikhawih te sulhnu chhui tur te, ruihhlo a sumdawng te hnuchhui tur tein an hmang nasa hle a; khawlaia patrolling a tana an tangkai leh zel avang hian nakumah chuan Ui fing 1000 zet neih hman tumin hma an la mek.

Phir lu-a inzawm ten kum 50 an tling dawn

    Phir an lu a inzawm tlat George leh Lori Schappell te chuan kum 50 an tling dawn ta. Pathianni lo awm turah kum 50 an pumhlum ang.
    Hetia inzawm si hi an nunphung leh duh dan erawh a inang lo khawp mai a, Lori hi bowler niin ten-pin bowler champion a ni a, George erawh zai ngaina tak niin Country & Western singer a ni thung. Lori hi 5ft 1in a sang a nih laiin George chu 4ft 4in a ni thung. Pennsylvania khawchhuak he phir inzawm te hi an luah inzawmin za a 30-ah an inzawm a, an thisen zam leh tihrawl inzawm a tam em avangin zai then theih a ni lo, an ti.