Tuesday, October 16, 2012

PHAR NATNA VEITUTE KA CHIBAI VE TA


October ni 9, 2012 zing khan Tlabung lam panin ka zin a, chhun dar 12: 30 pm velah Tlabung hmun thlengin, ka thlenna Zodin-ah ka bungrua te nghatin ka han awm hahdam deuh hlek hnu chuan, Tlabung hmuna awm ka cousin Mazuala chu hmun ka tlawh tur awmna vel ka hriat loh avangin min kalpui tur chuan ka sawm a, kan pahnihin Tlabunga ka tlawh tum hmun hrang hrang tlawh tur chuan Taxi hmangin kan tlan ta a ni.
(T. Shirt Pawl ha hi keimah ka ni)

            Zodin atangin Tlabung Civil Hospital lam panin kan tlan thla a, Civil Hospital piaha kawng peng lamah chuan Phar Damdawi In pan chuan kan tlan phei zel a, thui em em pawh tlan ngai lovin kan piah lawka, “Leprosy Hospital, Tlabung” tih lo intar leh Phar Damdawi In building hmun fal deuh raiha lo awm chu kan hmu ta. Taxi atanga chhukin Phar Damdawi In building thla te chu ka lak zawh hnuin damdawi In chhung lama lut tur chuan ka han inbuatsaih a, vawikhatmah phar la hmu ngai lo ka nih mai bakah, engtia han biak tur nge ni ang a, engtin nge min lo dawnsawn ang tih pawh ka ngaihtuah thiam chiah lo. Mah se, hei leh chen ka kal tawh a lawm tiin, Damdawi In chhungah chuan ka han lut ta a ni.
           
Phar Damdawi In ka tlawh chanchin tawite ka ziak tak tak hmain, Mizorama Phar enkawlna damdawi In (Leprosy Hospital) awm chhun Tlabung a mi hi 1978 khan din tan a ni a, Phar enkawl/mutna  khum awm tura tih a ni a, tunah hian Phar enkawl lai mi pathum (3) an awm mek a ni.
           
Leprosy Mission lam rawngbawlna sermon vawi tam tak lo ngaithla tawh mah ila, tu emaw sawi angin, “Phar te ka hmuh chuan ka chibai miah lo ang a, min lo chibai hmain, kut pahnih suihin, ‘NAMASTE’ tiin kun zeuh zeuh ila a ni mai” tia a sawi kha ka ngaihtuah chhuak a, kei hian tunah phar natna vei mektute chu ka hmu dawn ta a, ka chibai ang nge chibai lovang tih pawh ka ngaihtuah nasa hman hle a, amaherawhchu, eng nge ni raw sek sek ka chibai loh ang, an mahni chu ten leh an deh hlau tak anga ka awm min hmuh ka duh lo hrim hrim, chuvang chuan ka chibai ngei tur a ni tiin, ka rilru ka siam fel ta a ni.
            Damdawi In chhungah ka han lut chiah chu, chulai Phar damdawi In thlang vela cheng hnamdang nu ho leh naupang ho engemawzat chu damdawi in chhunga chhuat leh thutthleng velah te chuan thuin T.V an lo en hlawm a, han zawh mai ka hreh viau a, Phar natna vei ve tho an ni angem aw tia ngaihtuah rauh rauh chung chuan, chulai Ward khuma lo thu mek patling pakhat leh chhuata ‘Aiawt’ lo tah mek pa pakhatte chu ka han be ta a ni.

            Biak zawk bik em em pawh nei lem lova bia ka ni a, a Mizotawng thiam zawk chuan min lo chhang a, Phar Damdawi Inah chuan phar enkawl lai mek mi 3 an awm thu a sawi tak avangin, an mahni chauh chu phar natna vei an ni tih hriain midang lo awm vete chu an inlengte an nih thu ka hre ta a, chumi hnu chuan hreh hauh lovin phar natna vei mektu mi pahnih te nen chuan kutsuihin kan inchibai ta a ni. Chutia phar natna veitute’n inleng an neih chu kan thawm lo hriain, khum tawp bera mu mek putar lam tawh pakhat chu a rawn tho chhuak ve a, ani hi phar natna vei ve tho leh an zinga upa ber kum 75 mi a ni tawh a, ani nen pawh chuan kan inchibai ve leh ta a ni.
           
An pathum hian hnamdang vek an ni a, an hming leh kum zat bakah an khaw hmingte pawh ka zawt hlawm a, an hming sawi hi a spelling a dik leh dik loh chu ka hre hauh lo nain, a upa ber hi Orgun (75) ti maiin a sawi a, a dawttu kum 60 mi hi Rohidam-a a ni a, a naupang ber kum 55 mi Sondro Sen niin, ani hian ka tlawh lai hian ‘Aiawt’ thahnem tak a lo tah mek a ni.
           
Chuti anga kan inchibai zawh hnu chuan ka Camera leh phone hmang chuan an thla te ka han laksak zung zung a, khawi laiah nge phar natna an vei tihte zawtin an natna laite min hmuh chu thla te ka la zel a, kei chu a laiah thuin Phar natna veitu mi 3 te nen pawh chuan thla te kan la tlang ta a ni.
           
Ka thil hriat duh hrang hrang thute zawtin, chulai hmunah chuan Phar natna vei enkawl lai mi 5 an awm reng thin thu an sawi a, amaherawhchu, pahnih an thih tawh avangin tunah chuan enkawl lai pathum (3) chiah an nih tak thu an sawi a, pakhat phei chu September thla tawp lam khan a thi nghe nghe a ni.
           
He Phar Damdawi In bikah hian enkawltu Nurse pakhat leh Peon pakhat an nei a, doctor erawh a tul angin Tlabung Civil Hospital atangin a tul anga enkawl an ni thin a ni. Hei bakah hian eirawngbawl saktu an nei a ni maithei, ka kal lai hian choka lamah hmeichhe pakhatin eirawng a lo bawl sak mek a ni.
           
Heng pharte zinga pakhat, a upa ber dawttu Rohidam-a hi a ke artui bawr a ngalrek vel an tuam deuh bar a, hei bakah hian a ngal, a chawn chho vel hi vun pangngai ang ni lo, rawng dang deuhin a tial deuh ruan a, chubakah chuan a kut zungtang pawh a chanve vel chu a bul tawh a ni. A naupang ber kum 55 mi hi a ke zungtang lehlam lehlam a bul nuau tawh a, chubakah chuan a kut dinglam zungtang vel pawh a dik chiah tawh lo bawk. A upa ber kum 75 mi erawh hi chu a kut vel chu a tha viauin ka hmu a, a ke dinglam erawh a ke artui, nghal chho velah an tuam deuh bar a, pheikhawk a bun chu han phelh ve bawk mah se mawza a bun bakah an tuam tlat avangin chu em chu ka en chik zui sak ta bik lo a ni.
           
An zinga pakhat a naupang ber, ‘Aiawt’ lo tahtu chu enga tana aiawt tah chiam nge a nih ka zawh chuan, chung a aiawt tahte chu an zuar thin a, pakhat Rs 25 te’n an hralh a, chuta an sum hmuh chu chawhmeh leh an mamawh zawng lei nante an hman ve thin thu a sawi a, heng a aiawt tahte hi a nalh angrengin, chakai manna tur ringawt pawh ni lo, kaikuang manna ‘Awt’ turte pawh a ni hlawm a, a dangdai angreng hle a ni.
           
Chuti anga inkawmna hun tha tak kan nei thei leh Phar damdawi In ka tlawh thei chu ka lawm hle a, anni phar natna veitute pawh chu kan inkawmna hun rei lote mah nise an lawm ve hle-in ka hria a, hmun dang tlawh duh tam tak ka la neih avangin rei awm lovin Phar damdawi In chu kan kalsan leh ta a ni.
           
Ka han sawi tel lawk duh chu, Isua hunlai ata awm tawh Phar natna veitute dinhmun ka han ngaihtuah a, khatih hunlai khan Phar natna veitute chu midangte tana tenawm leh khawih pawh thiang lo, mite hmuhsit leh endawng an ni a, khaw chhungah pawh an awm remti lovin dai pawnah an awmna tur siamsaka dah thin a ni. Mah se Isua khan Phar natna veitute kha a hmangaih a, tihdam a duh a, a tidam a, an tan tihdam rawngbawl hna a lo thawk tawh thin a nih kha.
           
Tun hun thleng pawh hian Phar natna veitute hi mipui nawlpui thlir danah chuan natna tenawm leh tihbaiawm tak veitu niin kan la ngai deuh tlat a, kan thinhrikin, kan zinga awm ve reng tur chuan kan duh lo a ni mai thei. Amaherawhchu, phar natna hi enkawl dam theih a ni a, a tantirah uluk taka enkawlna tha pek an nih chuan an dam leh thei a ni. Chuvang chuan Phar natna veitute hi endawng mai lova an tana rawngbawl sakin, thilpek lamah te tan kan lak thar zel a tul hlein ka hria.

1 comment: